Por se aínda non sabes de que vai o festival...

O Festival de Cans é un peculiar festival de curtametraxes que se celebra no mes de maio na parroquia de Cans (O Porriño), coincidindo en datas co Festival de Cannes. Precisamente a idea do festival xurdiu da similitude entre o nome desta aldea galega e a da cidade francesa. Naceu en 2004, polo que a de 2008 será a quinta edición. Este ano celebrarase do 21 ao 24 de maio, aínda que o conxunto de actividades desenvolvidas extenderase ao longo de todo o mes de maio.

Características:

O Festival de Cans foi evolucionando nas catro edicións transcurridas, pero segue mantendo unhas características básicas permanentes. Estas son as principais.

O festival celébrase en Cans, unha parroquia rural do Porriño, con 450 habitantes.
Celébrase a finais de maio, coincidindo co Festival de Cannes en Francia.
O festival céntrase nas producións galegas actuais. A base da programación do festival son as curtametraxes, aínda que tamén se aposta pola estrea de longametraxes e documentais. Desde o ano pasado conta cunha sección dedicada aos videoclips e este ano abrirá un oco para a proxección de curtas documentais.
As curtametraxes proxéctanse en locais dos que son propietarios veciños e veciñas da parroquia e que durante todo o ano cumpren outras funcións, como poden ser: bodega, galpón, alpendre, baixo, etcétera.
O festival espándese por toda a parroquia, xa que as proxeccións teñen lugar en locais espallados por distintos barrios nun radio de 1 quilómetro.
Establécese un sistema rotatorio polo que o público con entrada pode asistir a todas as curtas, que se proxectan en varios locais de forma simultánea e durante catro pases.
O festival ten unha concepción ampla da cultura e un carácter eminentemente festivo, polo que se programan unha serie de actividades paralelas, especialmente actuacións musicais, festas temáticas, outras proxeccións, etcétera.

Obxectivos:

Os principais obxectivos do Festival de Cans son:

Crear un festival no que se potencie a curtametraxe galega, un espazo para os novos creadores no que poidan acadar unha repercusión mediática importante.
Crear un festival cun formato innovador que sexa capaz de chegar a públicos diversos, todo isto nun medio ao que habitualmente non chegan as curtas, como é o rural.
Establecer a partir do premio en Cans unha vía de saída para que as curtas gañadoras sexan vistas e recoñecidas en diferentes lugares e cheguen a un público máis amplo.
Buscar vías de contacto e diálogo con outros festivais de características similares por outros lugares do mundo, festivais de cine nos que as proxeccións se realizan fora de salas, teatros e outros espazos convencionais.
Dinamizar un espazo rural como é Cans, situándoo no centro dun evento cultural de primeira magnitude.
Establecer un diálogo entre o rural en transformación e a creación audiovisual.

O V Festival de Cans

Cans e Cannes volven compartir o protagonismo cinematográfico do mes de maio. A Costa Azul e o Val do río Louro volven competir por acaparar a atención dos focos. Pero a oferta que o Festival de Cans prepara para a súa quinta edición os días 21, 22, 23 e 24 de maio nesta parroquia do Porriño será difícil de igualar. O festival audiovisual galego máis popular e interxeracional volve á carga con máis salas, máis curtas, máis longametraxes, máis música, e sempre co maior protagonismo para o cine galego.

Os elementos icónicos do festival seguen aí un ano máis: os alpendres, galpóns e adegas que se converten en salas, a tropa de chimpibuses para transportar aos espectadores, as alfombras vermellas (e azuis) espalladas polos carreiros, moita música de sonoridade diversa e espírito festeiro e a hospitalidade de sona universal dos veciños e veciñas de Cans.