Recollimos as alfombras (vermellas e azuis) que enmoquetaban os camiños, desmontamos os asentos (tablóns por un lado, caixas de cervexa por outro), descolgamos as pantallas e os galpóns, cubertos, baixos, bodegas volveron ser o que eran. Os chimpíns deixaron de carrexar veciñ@s, cinéfilos, cineastas, espectadores, famosos, nenos e nenas, e volveron ao seu: a herba e o abono.

Na Asociación Cultural Arela, que organizamos este festival, estamos moi contento co resultado do Cans IV. Calculamos que arredor de 4.500 persoas se pasaron polo festival entre o mércores e o sábado. E o que é máis importante, cremos que os que estiveron pasárono ben.

Proxectamos 26 curtas cun nivel medio de calidade moi alto, algo que fala ben do cine galego e os seus/súas nov@s realizador@s. Estreamos unha longametraxe dun cineasta porriñés (“Abrígate”, de Ramón Costafreda), un thriller de animación con cacahuetes (“Gritos en el pasillo”) e un documental (“Só concertinas”). Cremos que acertamos co programa de actuacións musicais, e que o público gozou con The Ellas, a sesión de Juan de Pablos, os Bravos de São Vicente, a Turres Band, Tony Loba & Elio dos Santos e os Festicultores.

Visitáronnos figuras do audiovisual galego e español, con apelidos como Ulloa, Reixa, Gutiérrez, Manquiña, Carballal, Fábregas, de Lira, Blanco (H), Blanco (M), Delgado, Mosqueira, Tosar e un longo etcétera. Tivemos visitas chegadas de lugares como México, Holanda, Brasil e Core. Fixemos contactos interesantes con algún outro festival europeo e pronto sairá unha reportaxe sobre o festival nun dos xornais máis importantes de Sudamérica.

E puxemos en marcha seccións novas que chegaron para quedarse. O coloquio na leira, no que escoitamos a Tristán Ulloa no espazo acolledor da leira de Alicia. A Can Parade, quince propostas sobre o can do festival da man de moz@s artistas porriñes@s. E o concurso de videoclips, doce recreacións audiovisuais de temas do último pop-rock galego.

Isto foi todo. Se estiveches no IV Festival de Cans, agardamos que o pasaras ben e aquí che propoñemos uns enlaces para que non te esquezas do que foi. E se non estiveches, bótalle un vistazo aos enlaces para ver se che entran as ganas e o ano que vén te animas.

Lista de enlaces para coñecer/lembrar o festival:

Tres  cousas novas:

•  A crónica do festival , por Esmeralda L. Castro.
• O Festival de Cans nos programas da TVG Rec Camara e Onda Curta .
• No blog de María José Rouco atopamos interesantes textos e unha morea de fotos .
  

• A nosa galería de fotos, por Fátima R.Sío
• No apartado enlaces poderás ver videos colgados na web.
• Elianinha pasou 5 días en Cans e convertiuse na mellor cronista do festival para Xeracion.com .
• E navegando pola Rede atopamos varios blogs con referencias ao Festival de Cans. Indicámosvos os enlaces de doce deles: 1 , 2 , 3 , 4 , 5 , 6 , 7 , 8 , 9 , 10 , 11 e 12 .

Isto é todo. Grazas, e vémonos no quinto!!!