O IV Festival de Cans proxecta 26 curtas galegas e amplía a programación coa estrea de dúas longas, o concurso de videoclips, a “Can Parade” e o “Coloquio na leira” con Tristán Ulloa

Celébrase do xoves 24 ao sábado 26 de maio. As entradas póñense á venda o mércores 16. Increméntase o número de actividades de acceso libre

O PORRIÑO,  5 DE MAIO DE 2007

O Bar Fortes de Cans (O Porriño) acolleu esta mañá a presentación da cuarta edición do Festival de Cans, que se desenvolverá os días 24, 25 e 26 de maio, aínda que este ano conta con numerosas actividades paralelas que se extenderán ao longo de todo o mes. O festival presenta importantes novidades na programación, como a estrea de dúas longametraxes, un espazo para artistas emerxentes do Porriño chamado “Can Parade” e o “Coloquio na leira”, que se inaugura este ano co actor e director Tristán Ulloa.

Na presentación participaron o alcalde do Porriño, Raúl Francés; o director xeral de Comunicación Audiovisual, Manuel José Fernández Iglesias; o director xeral de Creación e Difusión Cultural, Luis Bará; o actor e membro do xurado, Víctor Fábregas; a representante da Asociación Cultural Arela, Corinne Pérez; e o director do festival, Alfonso Pato.

Novidades principais
Alfonso Pato explicou que “unha das novidades principais do festival é a ampliación da programación, co que se expanden os días e horas nos que se pode gozar das actividades”. Este ano estréanse dúas longametraxes, “algo moi significativo para un festival pequeno como o noso”. A primeira é “Abrígate”, do porriñés Ramón Costafreda, que se pasará o xoves 24 no Círculo Recreativo Cultural do Porriño, precedida dunha actuación da cantante Uxía, que interpreta varios temas da banda sonora do filme. A segunda película é “Gritos en el pasillo”, unha animación de terror de espírito friqui protagonizada por cacahuetes, que se pasará o venres 25 no Baixo do Moncho, unha das salas do festival.

Outra novidade deste ano é a inclusión dunha sección para premiar o mellor videoclip galego. Os vídeos seleccionados poderán verse o xoves 24 no Pub Tubulart do Porriño. O xurado que os avaliará está formado pola xornalista Belén Regueira, o músico e realizador Víctor Coyote e o mítico locutor de Radio 3 Juan de Pablos, que a continuación ofrecerá unha sesión musical no mesmo local.

Corinne Pérez indicou que “as propostas do Festival de Cans van máis aló do cine. Por iso este ano se convidou a 16 creadores emerxentes do Porriño procedentes dos eidos das belas artes, o deseño, a publicidade e o graffiti para que reinterpretasen a silueta do Can do festival. Se Vigo ten a Cow Parade, o Festival de Cans ten a Can Parade”. O resultado desta proposta poderá verse dende o 18 de maio nos escaparates comerciais do Porriño, e o sábado 26 nas leiras de Cans.

Nesta edición tamén abrimos o sábado pola mañá para actividades do festival. Será entón cando se celebre o “Coloquio na leira”, no que este ano participará o coñecido actor Tristán Ulloa, que vén de estrearse como director co filme “Pudor”.