VENRES 20: TRANSPORTES HERNÁNDEZ E SANJURJO + MARIO MALAPERSONA

Abran paso na noite do venres 20 de maio a dous transportistas singulares: Transportes Hernández e Sanjurjo traen a Cans un cargamento inflamable de música. Conducen o vehículo Julián Hernández, con máis de dúas décadas de experiencia ao volante de "Siniestro Total", e Rómulo Sanjurjo, mecánico-acordeonista de "Os Diplomáticos".
Dende 1999 veñen repartindo con exquisita puntualidade os seus paquetes de rock, pop, folk, blues e versións dos temas dos seus grupos. Para despachar os seus envíos en directo sírvense dun formato singular: voz, guitarra acústica, acordeón, mandolina e bases eléctricas.

Xunto con Transportes Hernández e Sanjurjo tamén estará no escenario Mario Malapersona. Din de el que é a referencia do novo folk industrial, algo así como o fillo punk de Javier Krahe. En Cans presentará os temas do seu primeiro disco "... y tú un poquito cabrón" que se publica en maio, editado por Discos de Freno. www.discosdefreno.com

SÁBADO 21: OS INCREÍBLES FASIDÚ

A parroquia de Guláns (Ponteareas) é o único lugar do mundo que adianta a Cuba en músicos por habitante. Da "Salzburgo galega", a terra dos ranchos, as bandas e Reveriano Soutullo, chegan Os Increíbles Fasidú. Oito músicos compoñen esta potente formación de ventos que provocaría a envexa de Emir Kusturica. Os Fasidú prepararon por encargo do Festival un repertorio baseado nas bandas sonoras de coñecidas películas e series de televisión, que na tarde do sábado 21 de maio farán soar en Cans. www.fasidu.com

FESTAS NOS BARES

Dende o 13 ao 22 de maio, a Festa do Cine extenderase aos bares de copas do Porriño. Os locais agrupados en Espacio Noite darán unha oportunidade aos cinéfilos de sentirse extra da súa peli favorita… ¡ou de todas!
Dúas fins de semana para percorrer os bares e tomarse unha copa en La Chimenena no "Cabaret" de Lisa Minelli, que ao cobrar nos pedirá "Money, money!". Ou aterrar n'A Cova para brindar co Howard Hughes de "O aviador".