Información práctica

ONDE COMER

Bar do Festival.
No mesmo punto de encontro do Festival de Cans, no torreiro á beira da Igrexa. Cañas de cervexa San Miguel fresquiñas e demais bebidas. Tamén poderás picar algo, sobre todo racións de empanada. Un lugar moi animado; a calquera hora do festival te podes atopar con actores, realizadores ou membros da organización. Ninguén pode marchar do Festival sen tomarse aquí unha caña (como mínimo).

Bar Fortes.
A 200 metros da Igrexa, seguido pola estrada arriba. Unha enorme casa de pedra, fácilmente recoñecible polas súas portas e ventás azuis. Un local que representa ese prototipo galaico entre bar e tenda de ultramarinos. Leva sendo bar desde hai cen anos, e se vos fixades aínda podedes ver nas paredes da entrada os aros de ferro para amarrar os cabalos. No Bar Fortes preséntase sempre á prensa o Festival.
Hai boas tapas e bos xerros de viño. Cómese ben (poden dar fe Luis Tosar e Javier Krahe, entre outros). Os días do Festival soe estar aberto ata a 1 ou 2 da mañá. Se queredes sentarvos en plan xantar, tamén o podedes facer, pero hai que avisar con tempo (Teléfono 986-331142).

Bar Moncho.
Está a uns cen metros da Casa de Bugarín (Sala de animación), na estrada que vai cara ó centro do Porriño. O bar clásico onde todo Cans bota a partida. Se berran moito, non vos asustedes; aquí as cousas funcionan así. Hai menú do día, a prezo módico. Se vades a xantar un ou dous non hai problema. Para grupos, mellor reservar (986- 333000)

A Taberna de Herminia.
No Alto do Confurco, en dirección a Ourense. A un Kilómetro da Igrexa de Cans. Mellor ir en coche. Tapas e viños. Outra tenda-bar, agora reformado cun certo gusto. Está ben para tomarlle un viño e unha tapa.

Outros.
Baixando pola estrada de Cans ata O Porriño, atoparedes dous clásicos da Rota dos Camioneiros (que ten no club Cisne o epicentro). Son os restaurantes Guanabara e Castro, de gran tradición en menús. Comida a bo prezo, e amplos aparcamentos.