CELSO BUGALLO, PREMIO DE HONRA PEDIGREE '05

O actor pontevedrés Celso Bugallo recibirá o premio de honra do Festival de Cans, o "Pedigree'05", como recoñecemento á súa traxectoria profesional e a súa implicación e apoio aos novos valores da curtametraxe en Galicia. A organización quere recoñecer coa entrega deste galardón a un actor dun profesional serio e coherente, que nos últimos anos acadou o aplauso de crítica e público por algunhas das súas máis destacadas actuacións.

Celso Bugallo obtivo en 2003 o recoñecemento xeral polo seu papel de Amador en Os luns ao sol de Fernando León de Aranoa. Na última edición dos premios Goya, logrou o galardón na categoría de actor de reparto pola súa interpretación do irmán de Ramón Sampedro no filme de éxito internacional Mar adentro.

Pero a traxectoria de Bugallo, nado en 1947 en Vilalonga (Pontevedra) é xa longa. Iniciouse no teatro nos anos setenta. Compaxinou os seus traballos teatrais cos seus inicios no audiovisual. Entre 1988 e 1992 promoveu a Aula de Formación de Actores. Dende finais da década dos noventa intensificou a súa presenza en televisión e cine e convertíuse nun dos rostros máis recoñecidos das pantallas galegas, cos seus papeis en series como Mareas vivas e Terra de Miranda e filmes como A lingua das bolboretas e A vida que che espera.

Ademais, Celso Bugallo non deixou de protagonizar curtametraxes galegas, co que amosa a súa disposición a colaborar cos novos valores do noso cine. Na pasada edición do Festival de Cans puidémolo ver en duelo interpretativo con Saturnino García en O derradeiro grolo.