Miguel de Lira,do verbo delirar e do mar de Lira (Carnota), onde naceu hai 41 anos. Estes dous elementos servíronlle para interpretar o seu personaxe máis popular, Currás, o persebeiro de Portosás. En troques, tanto antes coma despois disto a súa carreira actoral esténdese con solidez. De mozo marchou a Compostela para estudar Dereito e farto de tragar tochos infumables, decidiu memorizar textos ben diferentes. Xa non endereitou máis. Tralo trampolín do teatro universitario e como membro fudador da compañía Chévere, que seica son os Monty Pyton galegos, ascendeu a comandante da Sala Nasa (Nave de Servicios Artísticos), o espazo de cultura máis alternativo de Galicia. A partir de entón comezaron as ultranoites, os concertos, zinasa e tódalas obras de Chévere: "Annus horribilis", "Hero.es", "BigBang", "O navegante", "Unha fantasía electrodoméstica"... Entre elas, rebentou as taquillas "Río Bravo", un grelo-western no que De Lira é nin máis nin menos que o sheriff. Cando o país do nor-oeste se converteu no de Nunca Máis e da Burla Negra inventou o Mariscal Brush, un personaxe que andou pedindo polo mundo limpeza e sentido común. Témolo visto tamén na gran pantalla facendo cameos en filmes como "Urxa", "O lapis do carpinteiro" e "O agasallo de Silvia". Non menos furtivo que o de "Mareas vivas" foi o seu papel no telefilme "Entre bateas". E, por suposto, tamén experimentou coas curtas. Un exemplo, "Os Crebinsky", proxectada na primeira edición do noso festival. Chega a Cans logo de pasear galeguismo pola alfombra vermella da Berlinale co equipo de "One day in Europe (Galatasaray-Dépor)".

Teté Delgado, posiblemente a porriñesa máis televisiva, nada en 1965, ía para psicóloga, pero por un estraño fenómeno de parapsicoloxía acabou de presentadora-actriz-cantante, é dicir, todo unha showoman. Comezou na Reoca da TVG e de oca en oca deu o salto a unha casilla importante, Madrid, na que permaneceu tres anos como caixeira do "Súper" máis famoso do país, o de Tele 5. Logo houbo outras series e programas. Entre "El botones sacarino" e "Paraíso", puxo a voz en off en "Me gustas tú", co-presentou con Anabel Alonso "Un país maravilloso" e afrontou o seu propio espazo humorístico en "Un, dos, tres... ¡A leer esta vez!... Hai pouco aterrou de novo en Galicia cun papel en "A miña sogra e máis eu". No cinema pódese dicir que é unha chica García Sánchez, pois participou en tres filmes deste director: "Adiós con el corazón", "La marcha verde" e "Franky Banderas". Tamén a vimos en "Lisístrata" interpretando a Mirrima, a máis "maruja" de Atenas, emparellada con Jesús Bonilla, un matrimonio ben divertido. Non só a pantalla é o dela, tamén fixo as súas piruetas nos escenarios en obras como "Una mujer sin importancia", "23 centímetros" e "Terapia a las seis", esta última dirixida por outro galego enérxico, Moncho Borrajo. No eido musical mata o mono de micrófono nos karaokes e lidera o grupo de rock-soul T.T. y Los Supremos. E na súa sección de curtametraxes: "Me enamoré de un asesino bajito y feo".